|
|
Bigibila wiyayl |
|
Bigibila yanaawaanhi,
biyaduul. Bulaarr badjin mindjarru yanaawaanhi. (Giirr yilaalu nhama
mindjarru, bigibila, dhayn gigilanhi.) |
|
Milandu mindjarrugu
gayawiy barrandu nhama, dhinawan nhama. Giirr bundaanhi nhama dhinawan.
Bamba ngaama bundaanhi. |
|
Bigibilagubala winangay, guwaay:
"Aa, minya ngaama bundaanhi? Bamba nhama bundaanhi." |
|
Bulaayubala mindjarrugu nhama guwaay:
"Waal, waal baayamba. Waal baayamba." (Giirr bulaayu nhama gayrrbaldanhi
"baayamba".) |
|
Giirrbala nguu gagay: "Waa, waa,
waa, waa, maayndjul dhinggaa." Guwaaldanhi nguu dhinawandi, bigibila
nhalay. Giirr gaanhi nguu nhama dhinawan. Yilaa nguu nhama yilamay,
nguu nhama dhawumay. |
|
Giirr nguu guwaay mindjarru girran.girraa
dhiyamaligu. Giirr guwaaldanhi nguu: "Ngarraagulaynga yanaaya, girran.girraagu,
dhawumaligu ngiyani dhinawan." |
|
" Ngaayaybaay ngaan.gii." Bulaayu
guwaaldanhi. |
|
Giirr banagaylanhi yurrulgu, nhalay
badjinduul. "Nhalaygaa baayamba?, ngaan.gii?" |
|
"Ngaangaarran.gu yanaaya." Nguu
guwaaldanhi, "Yanaaya." |
|
Nhama bulaarr dhurray ngayagaya
maalaabididja. "Nhalaygaa ngaan.gii?" |
|
"Waal, ngaangaarran, ngaangaarran.gu!"
|
|
Yilaabala giirr nguu barraay dhinawan
dhawumaldanhi; yilaa dhinawan dhawumanhi. |
|
Dhinawanbala nhamanga dhuwimay nguu,
dhinawan ngaarrma, ngiyarrma nguunga dhaldanhi. Mindjarrubala nhama
dhaaynga yanaawuwinyi. |
|
"Yaamanga ngaan.gii! Giirr ngalinga
maayrr dhaldanha. Ngaa, ganabadhaay ngay wuuna." |
|
Bigibilagubala guwaay. "Waa, waa,
waa, waa, maayndjul dhinggaa!" Dhugay nguu ngaama guwaaldanhi. Waalbala
nguu dhinggaa wuudhanhi nhama bulaarrgu nhama badjingaaligu. |
|
Giirr nhama ngiilay yanaanhi, nhama
bulaarr, badjinduul. Dhurray bulaarr gadhuuga. [Giirr ganungabula
dhayn gigilanhi, nhama buurrngan.] |
|
Bulaayu guwaay nhama buurrnganda:
"Waal ngaan.giidju minyagaa ngalingu wuurri. Waal nguu minyagaa ngay
wuudhanhi. Waal ngay gana wuunhi, waal ngay gii wuunhi." |
|
"Ngaayaybaay." guwaay nhama buurrngandu.
|
|
Giirr nhama buurrngan yanaawaabay,
bilaarriyaay. Ngaa, nhamadhaaynga ganunga, buurrngan yanaanhi. Ngiyarrmanga
ganugu bilaayu dhunhi nhama. Bilaayu dhunhi, bilaayu dhunhi, aawu,
burrulaagu. |
|
Giirrnga nguu guwaay: "Nginaalingu
dhinggaa, nginu dhinggaa, nginu dhinggaa." |
|
Giirr nguu dhugay gagaldanhi "Waal,
waal." Yilaabala burrulaa bilaarr nguungunda waylanha. |
|
Nhama wiyayl nguungu, giirr nhama
bilaarr gigilanhi. Yalagiyu bigibila yanaaylanha wiyaylbil, bilaarrbil.
|
|